Молитва священномученику протоиерею Ярославу Савицкому, Ямскому
О, святый страстотерпче священномучениче Ярославе, ты от юности Христа возлюбил еси и по благодати Его священство восприяв, яко светильник веры и благочестия просиял еси. В годину искушений, внегда обышедше обыдоша страну нашу врази веры Христовы, яви тя Господь пастыря добра, душу свою за чад Божиих положивша. Ныне убо призри на ны, приими от нас усердныя молитвы и вознеси я ко престолу Святыя Троицы, идеже ты в лице святых новомучеников и исповедников Российских предстоиши, яко да твоим ходатайством утвердит Господь страну нашу, да укрепит дух веры и благочестия в людех православных, в пастырех Церкви да утвердит ревность в служении Богу и ближним и да призрит милостивым оком на нас, предстоящих и прибегающих к твоей помощи. Испроси убо у Всемилостиваго Господа мира умирение, земли плодоносие, от глада и пагубы избавление, скорбящим утешение, недугующим исцеление, падшим возстание, заблуждающимся на путь истины возвращение, подвизающимся в делех благих укрепление, сирым, неимущим, убогим и бездомным помощь и заступление. Споспешествуй, священномучениче Ярославе, святыми твоими молитвами настоятелю и братии святаго храма, идеже совершал еси служение свое во времена лютых гонений на веру православную, просвети умы и сердца наша светом Божественнаго учения, научи Бога и ближняго нашего любити и заповеди Господни соблюдати, да не по имени токмо, но всем житием нашим чада Божия явимся. Не забуди, отче Ярославе, обители святыя Гродненскую Рождество-Богородицкую и Свято-Екатерининскую, но соблюди от всякаго зла всех живущих и подвизающихся в них и на поклонение в них приходящих. Осени всех нас небесным твоим благословением, в скорбех и болезнех утешение, избавление и исцеление нам подаждь, да возблагодарим прославившаго тя Господа нашего Иисуса Христа, Емуже подобает всякая слава, честь и поклонение со Безначальным Его Отцем и Пресвятым и Благим и Животворящим Его Духом во веки веков. Аминь.
Тропарь священномученику Ярославу Ямскому
Тропарь, глас 41
Приспе день светлаго торжества,/радуется весь Ямская,/ и вси православные людие с нею ликовствуют,/ восхваляюще память свсященномученика Ярослава,/ пастыря добраго,/ душу свою за веру Христову положившаго /и сохраняющаяго от искушений и бед,/ всех, вопиющих верно/ спасай нас молитвами твоими, Ярославе, отче наш.
Ин тропарь, глас 3
Пастырю добрый и страстотерпче Ярославе Ямский, /моли милостиваго Бога, /да сердца народа русскаго к Себе обратит /и лютых прегрешений оставление / подаст душам нашим.
Кондак, глас 2
Яко страстотерпца и служителя Христова,/ Церковь Русская преславно почитает тя, отче Ярославе,/ ты бо жизнь твою страданьми за веру истинную увенчав,/ преселился еси во обители Небесныя,/ идеже предстоя Святей Троице,/ не престай молитися о чадех своих,/ сохраняй нас любовию тебе поющих:/ радуйся, заступниче и молитвенниче земли нашея.
1Этот Тропарь (на тот же глас) поется:
В Гродненском Рождество-Богородичном монастыре:
Днесь исполняется радости обитель Рождество-Богородицкая,/ и с нею вси православнии людие гродненстии ликовствуют,/ восхваляюще священномученика Ярослава,/ душу свою за веру Христову положившаго,/ и сохраняющаго от искушений и бед/ всех вопиющих верно:/ спасай нас молитвами твоими, Ярославе отче наш.
В Свято-Екатерининской обители Московской епархии:
Днесь исполняется радости обитель Свято-Екатерининская,/ и с нею вси православнии людие земли Московския ликовствуют,/ восхваляюще священномученика Ярослава,/ душу свою за веру Христову положившаго,/ и сохраняющаго от искушений и бед/ всех вопиющих верно:/ спасай нас молитвами твоими, Ярославе отче наш.
